جتكم خيبة

*هذا الموضوع قديم حبتين من أيام هوجة مصر والجزائر

*اولا ياريت اى حد هيقرأ يقرأ التدوينة لاخرها أه ياكدة يابلاش.

*تشهد كاتبة هذة التدوينة انها كانت اهلاوية ولكن نظرا للاحداث الاخيرة المؤسفة قررت تنهى علاقتها باى حاجة مدورة للابد..

*يعنى انا لا اهلاوية..ولا متعصبة ضد الزمالك... ولا بشجع الاسماعيلى...ومااعرفش حاجة عن بلدية او حتى غزل المحلة ده بصفتى مواطنة محلاوية...

هذة الصور والتعليقات اهداء الى الشعب المسكين والى كل من رافعوا علم مصر مدعيين الوطنية والولاء والوفاء  وكل الحاجات الظريفة دى.. خلونى ابدا...بسم الله الله أكبر..

اللى عمل الصورة دى واحد مصرى

وللأسف اللى عمل الصورة الغير محترمة دى ....برضة مصرى

وطبعا اكيد دى كمان اللى عملها ...مصرى ...قصدى يعنى مش جزائرى

هاه يلا تفتكروا مين اللى بدأ بتراشق الاحذية.....شطار ...واحد...م ص ر ى

يعنى مش الجزائريين هما اول ناس اللى سمونا مصرائيل...لا ياجرعان ده كان مصرى

هااااااااااااااااه ومين اللى عمل دى كمان....!!!.............. اللى هيجاوب هديله شيكولاتة

سامعه واحد اخر الفصل بيقول ........مصرى ....يلا سقفوا لنفسكم

طبعا احنا فى الشتايم مانتوصاش ...والحاجات اياها

وطبعا اللى عمل دى محترف مصـــــــــــــــــــــــــــــــــــرى

طبعا الصورة دى على هاردتكم ياه على خفة دم المصريين تلطش ماهو اللى عملها اكييد ......؟

شايفين التشجيع ده تشجيع المصريين........تحس كده انه وقتها الاهلى كان بيلاعب اسرائيل مش فريق مصــــــــــــــــــــــرى

هااااااااااااااااااااه ايه رايكو ....دول مشجعى مصر شفتوا الوطنية  ونعم المشجع المصرى البرئ

دى نتايج بحث على جوجل واكيد النتايج دى مصرية خالصة واصحابها مصريين...

صاحب المنتدى ده مصرى ...بس ياريت تركزوا على اسمة (الصفح الجميل)..........ونعم الصفح

دول بقى اعضاء المنتدى الكرام ................اللى برضة مصريين

كاتب الرد ده شوف الصدفة .............طلع................مصرى

الاسهم حمراء اللون دى انا اللى عملاها ...وطبعا مش ضرورى انوة عن ان اللى عمل الصورة وكتب عليها التعليقات المهذبة دى مصرى.............اللى لفت انتباهى بقى انه حقيقى اد ايه انسان ولسه جواة بنى ادمين ياريت تلقوا نظرة سريعة على توقيعة اللى بيوقع بية فى المنتدى هتلاقوة جوه مستطيل احمر ..............................................................توقيع مصرى

دى ردود بعض اعضاء احد المنتديات...... اللى سبحان الله سبحان الله...... طلعوا مصريين

ابقوا بصوا بصه على توقيع الواد الاخرنى ده برضة

طبعا اللى قام بانتاج هذا البوستر الفظيع مصرى

وعلى راى الواد سيكا الصياعه ادب مش بوسترات

الصورة مش محتاجة تعليق..

ومع ان اللى خربها وقعد على تلها كان برضة مصرى

واللى مصر يكمل خرابها ويجيب ضلفها سمعت إنة مصرى...

ده مايمنعش برضة ان باقى افراد العصابة ....مصريين

واللى بينفخ الشعب المصرى..............مصرى

واللى كل يوم قرفينا بكذبهم وضحكهم على الشعب ............مصريين

واللى كل يوم يحرقوا دمنا غصب عننا بيقولوا انهم مصريين

والناس اياهم اللى عايزين يولعوها ......ماهم بيدعوا برضة انهم مصريين

اللى عايزيين يخربوا قضاءنا ونجحوا فى كدة مصريين

اللى داسو على دستورنا بالجزم ومرروا قوانين على مزاج امهم مكتوب فى بطايقهم فى خانة الجنسية مصرى

واللى حولوا بلدنا لمنشأت عسكرية وثكنات مصريين

واللى صهين وطنش الانتخابات وماراحش ........مصرى

ده طبعا غير انه اغلب الشعب ماعندوش بطايق من اساسة ومش ناوى يعمل 

واللى صهين عن حقة ووصلنا لكدة ...مصرى

واللى بيتحرشوا بالبنات ...........رجالة...........مصريين

والرشاوى اللى على ودنة ...بيدفعها وبياخدها مصريين

واللى يوميا بيزوغوا من الشغل او مابيروحوش اصلا ....م ص ر ي ي ن

والل ماتوا فى حوادث القطارات مصريين

اللى غرقوا فى العبارة...والمعديات ...والمسئوليين عن كل ده مصريين

واللى شوهوا صورتنا ...وفضحونا بتقديم اعلام فاسد لا يعبر عن اى مصرى... هم للأسف مصرييون

واللى حولونا لشعب جعان .......؟

وإنك تاخد الدوا فتموت مش العكس ده مابيحصلش غير لو كنت مصرى

وهو ده حال المصريين

كل هذا

ومازال كل مايشغل بال المصريين

هيفا اتجوزت مين....!

او اى خبر اصفر ...وتافهة...من اياهم

او ماتش كورة...

مش دى حاجة غريبة !

لكل الأسباب اللى فاتت...

احب أهنيكم وأقولكم............. جتكم خيبة

جتكم ستين خيبة

ياللى حولتوا الوطنية وحب البلد لحبة أعلام وشوية بوية لطشتوا بيها خلقكم ...ومبارايات فى الردح والشتيمة... وفيديوهات عاليوتيوب كلها قلة أدب وكام جروب عبيط 

جتكم ستين خيبة

ياللى نسيتوا ازمتنا الحقيقة وبدل ماتجمعكوا مظاهرة ضد اوضاعنا المخجلة فى بلدنا ...جمعكم وهم... جبت الديب من ديلة منك لية يااخويا

جتكم ستين خيبة

ياللى نسيتوا اعداؤكم الحقيقين ...وخضتوا حرب هزلية مضحكة ضد الجزائريين

جتكم ستين خيبة

يالى شوهتوا بلد كلنا نعرفها باسم (بلد المليون شهيد) وطلع تافهة يقول(القذائر بلد المليون سفاح)

جتكم ستين خيبة

ياللى صورتوا المصريين ملايكة وشويه هنلاقى الجنحات طالعة... ونسيتوا حقيقتكم...ونسيتوا شكل تشجيعكم

جتكم ستين خيبة

ياللى ساقوكم كالخراف منومين وشحنوكم ضد الجزائر وشعبها...

جتكم ستين خيبة

ياللى طلعتوا تهواهوا وتزيطوا فى وسط الزيطة......... وعشان كل واحد يعمل نفسة وطنى يشتملة شوية ويدينا كام درس عن الوطنية والانتماء والولاء

ودلوقتى كسبنا اية...؟

مشاكلنا اتحلت...ونسيناها... وموضوع الساعة اللى حصل فى السودان طب بركة ياجامع

كرهتوا الناس فى القومية العربية 

خلاص فى نظرنا الجزائر زى مابعض الجهلة قالوا يهود العرب

10 اغانى على كل المواقع زيادة  عن مصر وحبها

ورغى وعجن ...كل يوم على قنوات متخلفة وبرامج اكثر تخلف مع مذيعين هم نجوم فى الغباء

كام مقاطعة للجزائر ...الا ماعملتوا مقاطعة مع اللى بيدوكم على قفاكم يوميا... بس هو احنا كدة مانقدرش على الحمار وانتوا عارفين الباقى

ولما طلع بعض العقلاء من المفكريين او الصحفيين او المدونين عشان يقولوا ان اللى حصل ده غباء فى غباء اتهمهم البعض بالخيانة واتشتموا بااقذر الشتايم..

ونظرا لانى مابشتغلش عند حد

 ولانى لا امثل او انتمى لاى حزب

ولا اعبر الا عن وجهة نظرى الخاصة

فاحب اهنيكم بالخيبة

واسألكم سؤال واحد هو انتوا هتفقوا امتى ..؟

وياريت اسمع فى نهاية الفقرة أغنية ما شربتش من نيلها.