شعب نظيف

يعنى بعد كل اللى حصل فى المحلة يوم 6 إبريل وبعد إحتلال قوات الأمن فوق التلت شهور وبعد ماهبدوا ورزعوا وشقلبوا حال البلد وبقالهم فوق السنتين اهو قرفينا اعمال صيانة و رصف طرق والمحلة جميلة يابتاع البليلة ومقاولين عرب وباخوم وانا هموت واعرف مين باخوم ده وهاتوا عماويد وشيلوا عماويد ودهانات وإيشى فسيفساء وحاجه اخر الجه انزل اول امبارح القى واد ابن دزمة اسمه عمرو هو وشلتة موقعين لنا العموايد الجديدة الفضى الامورة اللى على الطريق نواحينا طب اقول ايه انا  غير اننا بجد شعب نضيف وتوقعاتى طبعا ان السور الرخام اللى كام متر اللى كلفة سى عبدالسميع اللى كان نايب دايرتنا الوطنى من جيبه اه من جيبه انا شفته بعنيا اللى هياكلهم الدودد دول حتى من وقتها ياحرام جيبه فضى عشان كده قرر ابنه يدخل الإنتخابات بداله, هيتحول قريبا لمراحيض عامة واتوجراف للحبيبة وحتة نضيفة للباعة السريحة,مش عارفه بصراحة هى المشكلة فى مين بالظبط.

المفقوعة مرارتها "أسماء" سابقاً.