أطفال صيني أم المصري

كام مره كنت ماشى في شارع ولا قاعد في جنينه ولا حتى راكب عربية, وشفت عيل صغير بياكل شيبسى ولا بيشرب كان ولا اى حاجه و أول ما خلص قال لمامته ولا باباه ..ارمى ده فين..؟ فيرد الأب أو ألام بكل بساطة ارميها جنبك ولا عالارض ولا ياخدها ويطوحها من شباك العربية!!!

بذمتك يا مؤمن كام مره شفت الموقف ده ,عن نفسى كتير اوووووى بالعبيط يعنى.

اسمع ياسيدى من يوم شفت بقى الخبر ده وموثق بالفيديو قال بيقولك مدرسة إبتدائى وتحديدا فى منطقة "شينجيانغ" الصينية عملت عرض أزياء للأطفال بهدف تسليط الضوء على حماية البيئة هاااه حماية البيئة..!!! وده بقى كان إن الأزياء كلها عبارة عن بقايا الخضار والفاكهة وحاجات بقى كده من اللى احنا بنرميها فى الزبالة يعنى مثلا اكياس ورق ولا حتى بلاستيك وجرايد قديمة ,وطبعا يعنى الأطفال الصينيين هما اللى مصممين الأزياء دى بنفسهم .

قمت انا ايه بقى لما اتفقعت قلت ادور عالموضوع عالنت ويارتنى مادورت, اكتشفت انه الموضوع ده عادى واتشيم اتشيم(اتشيم=قديم)يعنى مش افتكاسه من المدرسة دى وانه موجود من زمان وان اغلب المدارس بتعمل كده ,احتفالات وعروض أزياء والملابس كلها تكون من الحاجات القابلة للتدوير والمخلفات .

فى العرض بقى كان فى واد قمر لابس نص بطيخة على راسه انا شفته من هنا وجت لى كريزة ضحك وقلت الواد ده طبعا فى مصر لو حد شافه هياخد تريقة بالعبيط.

احنا كده ممكن نستورد اى حاجه وكل حاجه الا الحاجات دى ,عيب بقى والله لازم يعنى بما ان الجيل الكبير كله مضروب وده الكلام عليه حدث ولا حرج, مش عايزين الخيبه توصل للنشء والأجيال الجديدة ,فكر كده لو علمت ابنك انه يحترم البيئة اللى هو عايش فيها ده لما يجى يتعامل مع انسان زيه هيعامله ازاى ...ده هو اصلا إتعلم يحترم بيئتة والجمادات اللى عايش وسطها فما بالك بقى بالبنى آدميين. 

"كيس بلاستيك صغير"  فى جيبك.. وتحطيه ياهانم فى شنتطك وفى جيب العيال ونعودهم واحنا بره او خارجين اى حاجها ناكلها نحطها فى الكيس ونفضل ماشيين بيه لحد مانرجع البيت او نلاقى اقرب سلة قمامة ونرميه وعلى فكره يعنى النضيف نضيف فى بيته وبره بيته.