أه بجد الحمد لله, أنا بحمد ربنا لأنة رقم جامد فعلا..لـ(120 ألف) دول ما لقيتهمش وأنا ماشية في شارع جنب الحيطة,
ولا حتى طلع لي عم في بلاد الواق واق مات و ورثته طب يا ريت,الـ(120 ألف ) دول هما
عدد الناس المحترمين بجد اللي قاطعوا الفيس بوك يوم 24 أكتوبر زي ما اتفقوا ووفوا
بوعدهم.هما صحيح قفلوا الموقع ومش دي المشكلة لأن الحرب على الإسلام أو النزاع
القائم ما بين الخير والشر ده ممتد إلى قيام الساعة ومش مع كل جروب هنعمل حملة في
طرق تانية كتير وأنا مقتنعة تماما إن الفكر لا يواجة إلا بفكر, لكن اللذيذ في
الموضوع انه أول مره ينجح العيال البلوجرية وأعضاء الفيس بوك في توحيد جهودهم
وإنهم يجتمعوا على قرار واحد وينفذوه فعلا.
أه والله نفذوه.
الفردية Teamwork
ولأن دي مشكلة خطيرة في مجتمعنا كانت دايما متفشية بين
الأجيال اللي سبقتنا, لكن المصيبة اللي تستاهل اللطم على الخيبة والنيبة بجد إنها
بقت موجودة بينا إحنا كجيل جديد وشباب وهى الفردية والله حاجة تكسف ما بنعرفش نعمل
اي حاجة جماعية وتنجح لية..؟عشان كل واحد عايز يتفزلك ويفرد عضلاتة ويوريك انه
فاهم اكتر من الباقيين قوم إيه الموضوع يفرد منة ويبوظ وبدل ما تطرح فروالة تطلع
بتنجان.يعني هضرب لكم مثال في جروب ابن حلال عالفيس خاص بطلبة كلية العلوم(اسمه
ضحايا كلية العلوم) أه والنبي إحنا ضحايا رجوعا لمرجوعنا الجروب تمام جدا وفية ناس
بجد فخورة اني أتعرفت عليهم وبقيت واحدة منهم ناس مش داخلة تلعب وتهيس والسلام, لا
الجروب مليان مواضيع مفيدة ,وأي حد عنده مشكلة في الكلية ممكن يحكيها ,كمان لو حد
محتاج مساعدة أو استفسار ممكن يطلب المساعدة وعلى أدنا يعني,غير إنه مليان نوادر
وحواديت عن طلبة وخريجي كليات العلوم في بر مصر في ظرف سنة أو أقل انبثق عنة حوالي
10 جروبات بنفس الفكرة وخد عندك(جروب كميا خاصة_علوم القاهرة_جيولوجيين جامعة
الأزهر_كافية علوم طنطا_جروب تانى علوم أزهر_رابطة العلميين_علميين مصر_جروب
التخلص من كلية علوم_رابطة كارهي الكيمياء العضوية_نقابة المهن العلمية _كم عدد
طلاب كلية العلوم عالفيس بوك)الخ الخ…
الخلاصة إن كل جروب من دول تلاقى فيه من 80 الى400 عضو,صحيح
إن في بعض الجروبات لازم تكون مستقلة لأن ليها اتجاة معين, لكن الفكرة إن في زمن
قصير أتعمل جروبات كتير مكررة ما بتقدمش أي جديد خالص ومحصلتها = صفر,وده لأن
البصلة اللي في دماغنا ما فيهاش أي فكرة عن الإبداع والشغل الجماعي وكل اللي بنسعى
لتحقيقة هو التميز الفردي , يعنى لو كل واحد مننا شارك بأفكارة مع غيرة هيقدموا
حاجة أفضل وأحسن بكتير بالعكس عن ما كان كل واحد فيهم نفذ فكرتة لوحدة ,أنا هتخيل
كده لو إن كل الجروبات دي وحدت جهودها في جروب منظم يشرف علية ناس مهتمة فعلا
بأنها تقدم حاجة بجودة عالية+حبة الأفكار المختلفة اللي جوا كل واحد كل ده هيطلع= منتج
مشرف أكيد,وفكنا بقى من الأنانية الكومبو اللي مش جايبه همها اللي جرب شغل الشباب
في أي مجموعة عمل أكيد فاهم كلامي كويس,مشكلتنا بس إننا مطنشين ومش حاسين بحجم
الكارثة ومتجاهلين دورها الفعال في تأخرنا لحد دلوقتى .
"حاجة تقرف"
ده وصف دقيق لإحساسي تجاة أي (teamwork) إشتغلت فيه,كل واحد
عايز لا مؤاخذة يبلطج ويفرض رأية وما بنعرفش نسمع بعض,ما عندناش إستعداد أصلا,فاقدين
لكل مهارات الاتصال أو حتى التعايش,ده حتى وإحنا واقفين في المعمل والله الواحد
بيشوف مهازل,بلاش دي يا راجل ده حتى ماتشات الكورة في اكتر من كدة يلا ربنا موجود
يهدكم ياللى في بالى.
عشان كده فرحت جداً بنجاح يوم المقاطعة ده, والسبب إن كل
جهودنا بقت موحدة في جهة واحدة مش طلعلنا 10 جروبات ولا اكتر بنفس الفكرة شتت
الناس وتوهتهم , زى ما حصل في موضوع مقتل الدكتورة مروة الشربينى, وزى ما بيحصل في
الجروبات العبيطة في وجهة نظري, اللي كل واحد فاضي وعشان يحسس نفسة قال إيه إنه
عمل إنجاز يروح فاقعك جروب جديد (عايزين نجمع مليون توقيع عشان كذا) أو(معا
للمطالبة بوقف كذا),قوم ايه بقى..؟ تاني يوم تصحي تلاقى 10 جروبات بنفس العنوان
والدعوة لا واللي عمل الجروب اسم النبي حارسه وصاينه يبقى نايم قرير العين انه كده
خدم بلده ودينة وعمل اللي علية وزيادة وانه أكيد بعد بعد بكرة هيا خد جايزة الدولة
التقديرية ويطلع في العاشرة مساءا,,, لمجهوداتة الفظيعة..ما هي فظيعة فعلا..هو في
أفظع من كدة,
أه في الأخر أنا لا أقصد بكلامي هذا التقليل من شأن حد أو
توجية إهانة لكائن من كان,,,دي كانت هرشة نافوخ مش اكتر.
